شۆرای رێبه‌ری بۆ مافی مرۆڤ، سرنج نه‌دانی جیهانی سه‌باره‌ت به‌ مه‌رگی چالاكی سیاسی كورد "كاوه‌ عه‌زیزپوور" له‌ گرتووخانه‌، تووڕه‌و خه‌فه‌تباره‌. هه‌ر وه‌ك له‌و زانیاریانه‌ ده‌ركه‌وتووه‌، ناوبراو به‌ هۆی ئازار‌و ئه‌شكه‌نجه‌وه‌ تووشی "جه‌ڵته‌ی مێشك" بووه‌.

له‌ راپۆرتی ماڵپه‌ڕی حیزبی دێموكراتی كوردستانی ئێراندا هاتووه‌ كه‌ كاوه‌ عه‌زیزپوور 25 ساڵه‌، 2 ساڵ‌ له‌وه‌ پێش به‌ تاوانی هاوكاری له‌گه‌ڵ‌ ئه‌و حیزبه‌، گیراوه‌.

به‌رپرسانی قه‌زایی ئێران ده‌ڵێن:"عه‌زیزپوور له‌ نه‌خۆشخانه‌یه‌كی ورمێ‌ پاش 20 رۆژ تێپه‌ڕبوون له‌ حاڵه‌تی كۆما، كۆچی دوایی كردووه‌"‌و هه‌روه‌ها وتیان كه‌ دوای ئه‌وه‌ی له‌ گرتووخانه‌ی مه‌هاباد تووشی جه‌ڵته‌ی مێشك ده‌بێ‌، ده‌گوێزرێته‌وه‌ بۆ ئه‌و نه‌خۆشخانه‌یه‌.

به‌ پێی راپۆرتی هه‌واڵنامه‌ی خوێندكارانی زانستگه‌ی "امیر كبیر" له‌ كاتی به‌خاك سپاردنی‌دا، بنه‌ماڵه‌كه‌یان شوێنی ئه‌شكه‌نجه‌كانی ده‌بینن كه‌ بووه‌ته‌ هۆی ئه‌و جه‌ڵته‌ مه‌رگهێنه‌ره‌.

ئه‌سعه‌دی برای كاوه‌ عه‌زیزپوور به‌ هه‌واڵنێرانی راگه‌یاند كه‌:"كاتێ‌ كاوه‌ بۆ دووهه‌مین جار چووه‌ حاڵه‌تی كۆماوه‌، هاته‌وه‌ هۆشی خۆی، به‌ڵام به‌رپرسانی ئیتلاعات بێ‌ سرنجدان به‌ ئاگاداری پزیشك‌و سه‌ره‌ڕای پێویستی زۆری كاوه‌ بۆ چاوه‌دێریی پزیشكی، ئه‌ویان له‌ پاش 48 ساعه‌ت پاش عه‌مه‌لیاته‌كه‌ی برده‌وه‌ گرتووخانه‌ی ئیتلاعات". ئه‌سعه‌د له‌ درێژه‌دا وتی كه‌:"براكه‌ی له‌ به‌ندیخانه‌ سێهه‌مین جه‌ڵته‌ی مێشك لێیدا.

ئه‌و كرده‌وه‌ ناپه‌سه‌ندانه‌ی كه‌ ئێران به‌رانبه‌ر به‌ندكراوانی سیاسی‌و به‌تایبه‌ت نه‌ته‌وه‌ غه‌یره‌ فارسه‌كان نواندوویه‌تی، هۆكارێكی به‌هێزه‌ بۆ بڕواكردن به‌ ئیدیعاكانی بنه‌ماڵه‌ی عه‌زیزپوور. شۆرای رێبه‌ری به‌ هاوكاری له‌گه‌ڵ‌ كۆمه‌ڵه‌ نێونه‌ته‌وه‌یی‌یه‌كانی مافی مرۆڤ پشتیوانی خۆی له‌ بنه‌ماڵه‌ی عه‌زیزپوور ده‌رده‌بڕێ‌‌و حكوومه‌تی مه‌حموود ئه‌حمه‌دی‌نه‌ژاد به‌ هۆی ئه‌م دوایین كرده‌وه‌ دڕندانه‌یه‌، تاوانبار ده‌كا. كه‌مینه‌ ئه‌تنیكیه‌كانی ئێران به‌ هۆی ئه‌و جیاوازیانه‌ی كه‌ یاسایی كراون‌و ده‌چه‌وسێنه‌وه‌، له‌ راستیدا ئه‌وانه‌ی كه‌ ده‌وێرن داوای مافه‌كانیان بكه‌ن، ده‌بنه‌ بابه‌تێك بۆ ئه‌و جۆره‌ ره‌فتاره‌ی كه‌ به‌و شێوه‌ سامناكه‌ به‌رانبه‌ر به‌ عه‌زیزپوور كرا.

سه‌رۆكی شۆرای رێبه‌ری بۆ مافی مرۆڤ خاتوو"كاترین كامێرۆن پۆرتێر" حكوومه‌تی ئێران به‌ هۆی كوشتنی كاوه‌ عه‌زیزپوور، مه‌حكووم ده‌كا‌و داوا له‌ كۆمه‌ڵگای نێونه‌ته‌وه‌یی ده‌كا به‌رانبه‌ر به‌ له‌به‌رچاو نه‌گرتنی مافه‌ بنچینه‌یی‌یه‌كانی مرۆڤ زیاتر گوشار بخه‌نه‌ سه‌ر تاران. ئه‌و ده‌ڵێ‌:"بێ‌ده‌نگی له‌و نموونانه‌دا بۆ هه‌ڵبژاردن نابێ‌. ئه‌و كرده‌وه‌ نابه‌چێ‌یانه‌ی كه‌ رێژیمی ئه‌حمه‌دی نه‌ژاد به‌ڕێوه‌یان ده‌با، پێویسته‌ به‌ته‌واوی ده‌ربخرێن. ئێرانی‌یه‌كان به‌ هه‌ر رابردوویه‌كه‌وه‌ كه‌ هه‌یانه‌، بۆ ماوه‌یه‌كی زۆره‌ ده‌چه‌وسێنه‌وه‌. رێبه‌ران‌و پێشڕه‌وانی عه‌داڵه‌تی كۆمه‌ڵایه‌تی‌و مافی مرۆڤ ده‌بێ‌ په‌یامێكی به‌هێز بنێرن‌و رابگه‌یه‌نن كه‌ ئه‌و كرده‌وه‌ ناحه‌زانه‌، چاوپۆشی لێ‌ ناكرێ‌".