لقی‌ 15ی‌ دادگای‌ شۆڕشی‌ تاران، یووسێف عه‌زیزی‌ به‌نی‌تۆرۆف، نووسه‌ری‌ ناسراوی‌ عه‌ره‌بی‌ به‌ پێنج
ساڵ‌ زیندان مه‌حكووم كرد.
ماڵپه‌ڕی‌ رادیۆ زه‌مانه‌، وێڕای‌ راگه‌یاندنی‌ ئه‌م هه‌واڵه‌، نووسی‌ كه‌ ناوبراو به‌ تۆمه‌تی‌ "هه‌وڵدان بۆ تێكدانی‌ ته‌ناهیی‌ نێوخۆیی‌ وڵات" ئه‌م حوكمه‌ی‌ به‌سه‌ردا سه‌پاوه‌.
به‌پێی‌ سه‌رچاوه‌كه‌ به‌نی‌تۆرۆف به‌وه‌ تۆمه‌تبار كراوه‌ كه‌ له‌ ناڕه‌زایه‌تییه‌كانی‌ 26ی‌ خاكه‌لێوه‌ی‌ 1384ی‌

 خه‌ڵكی‌ خووزستاندا ده‌ستی‌ هه‌بووه‌.

له‌و كاته‌دا خه‌ڵكی‌ خووزستان پاش بڵاوبوونه‌وه‌ی‌ نامه‌یه‌ك له‌ ده‌فته‌ری‌ سه‌ركۆماریی‌ رێژیمه‌وه‌، ناڕه‌زایه‌تیی‌ به‌ربڵاویان ده‌ربڕی‌.
ناوه‌ڕۆكی‌ نامه‌كه‌ پێویستیی‌ گۆڕینی‌ دێموگرافیی‌ خووزستان بوو.
ناڕه‌زایه‌تیی‌ عه‌ره‌به‌كانی‌ خووزستان به‌ توندترین شێوه‌ له‌ لایه‌ن هێزه‌ سه‌ركوته‌ره‌كانی‌ رێژیمی‌ ئاخووندییه‌وه‌ سه‌ركوت كرا.
ئووستانی‌ خووزستان، ئوستانێكی‌ خاوه‌ن نه‌وت‌و عه‌ره‌بنشینه‌ كه‌ دانیشتووانی‌ له‌ داهاتی‌ نه‌وت بێ‌به‌شن‌و مافه‌ نه‌ته‌وه‌یی‌یه‌كانیان له‌ یه‌ن رێژیمی‌ ئاخووندییه‌وه‌ پێشێل ده‌كرێ‌.
رادیۆ زه‌مانه‌ هه‌روه‌ها، رایگه‌یاند كه‌ ساڵح نیكبه‌خت، پارێزه‌ری‌ به‌نی‌ تۆرۆف وتوویه‌ له‌ به‌رامبه‌ر ئه‌م حوكمه‌دا ناڕه‌زایه‌تیی‌ ده‌رده‌بڕێ‌.
یووسێف عه‌زیزی‌ به‌نی‌تۆرۆف، ئه‌ندامی‌ ناوه‌ندی‌ نووسه‌رانی‌ ئێرانه‌ كه‌ له‌ بواری‌ مافه‌ نه‌ته‌وه‌یی‌یه‌كانی‌ عه‌ره‌به‌كانی‌ خووزستاندا چالاكییه‌كانی‌ به‌ڕێوه‌ ده‌بات.